Sunday, 14 August 2016

അനാഥത്വം


മാതാപിതാക്കളുടെ സ്നേഹപരിലാളനങ്ങൾ അനുഭവിക്കാന് കഴിയാതെ പോയ അനാഥക്കുഞ്ഞുങ്ങൾക്കായി സമർപ്പണം ...

ഈ ഭൂവിലേറ്റവും ശ്രേഷ്ഠമാം സ്നേഹം
ആരുടേതെന്നു ഞാനാരായവേ
പെറ്റമ്മതന്നുടേതെന്നു കേട്ടന്നു ഞാന്
പെറ്റമ്മയാരെന്നു ചോദിച്ചുപോയ്...
ഒരു ബാലനേയേറ്റം സുരക്ഷമായ് താങ്ങുന്ന
പാണികളാരുടേതെന്നോർക്കവേ
പ്രാണനേകുന്നൊരാ താതന്റെയാണാ-
ക്കരങ്ങളെന്നാരോ പറഞ്ഞുതന്നു..
അമ്മതന് സ്നേഹവും അച്ഛന്റെ കരുതലും
തേടിയോരെന്നുടെ തിരുനെറ്റിയില്
അനാഥനെന്നു പതിച്ചവരോടായ് ഞാനതിന്
അർത്ഥമെന്തെന്നു ചോദിച്ചീടവേ
അർത്ഥമില്ലാത്തൊരു ചിരിയെന്നിലേക്കെറി-
ഞ്ഞീലോകമെവിടെയോ പോയ്മറഞ്ഞു....